A muralla de Ávila, con 2000 anos de antigüidade, é o recinto defensivo mellor conservado de España e un dos máis destacados do mundo. Esta cidade convida a dar un paseo pola historia a través dunha fortaleza que mantén o mesmo aspecto inexpugnable que tiña no século XII.

Xoia do Renacemento español, cun impresionante centro histórico monumental, a cidade é un destino de oleoturismo, con numerosas actividades vencelladas á cultura do oliveiral máis grande de Europa.

As murallas de Cáceres acollen un fermoso conxunto de casas señoriais góticas e renacentistas que foron escenario de producións como Game of Thrones. Impresionan a súa beleza e a súa riquísima oferta gastronómica.

Trátase da única cidade de España con catro declaracións de Patrimonio Mundial: o seu centro histórico, a mesquita-catedral, a Medina Azahara e a Festa dos Patios, sen esquecer o flamenco e a dieta mediterránea. Unha cidade marabillosa que convida a vivir o presente percorrendo calellos estreitos e alegres que conservan o seu carácter medieval.

A súa cidade fortificada é Patrimonio da Humanidade da Unesco polo excelente estado de conservación do seu centro histórico medieval. Nela, atópase a primeira catedral gótica de España e as famosas casas colgadas na foz do río Huécar, unha magnífica paisaxe natural.

O centro histórico de Eivisa é Patrimonio da Humanidade, xunto co museo arqueolóxico de Puig des Molins —único no mundo— e a Posidonia oceanica, unha planta submarina que protexe o Mediterráneo. Eivisa é historia, biodiversidade, cultura e unha cidade universal.

O escenario do teatro romano de Mérida, un dos máis impresionantes do mundo, encádrase nun conxunto monumental que inclúe o templo de Diana, a alcazaba e o Museo Nacional de Arte Romana. Unha cidade chea de historia e beleza que namora polos seus vestixios arqueolóxicos e os seus abundantes eventos culturais.

Coñecida como «a cidade de ouro» porque as súas fachadas de pedra calcaria brillan coa luz do crepúsculo, Salamanca conta cunha praza maior que é unha das máis extraordinarias de España. Destaca tamén a fachada plateresca da súa universidade, que constitúe un dos monumentos máis importantes da arte renacentista española. Unha cidade repleta de vida e eventos culturais, cunha gastronomía espectacular.

O escritor e xornalista Juan Cruz define do seguinte xeito a única cidade Patrimonio da Humanidade das Canarias: «La Laguna é unha cidade aberta como unha cuncha de aire sobre a auga. Está feita de historia e persoas. Espérate e despídete, pero non te abandona. Es ti, camiñando por ela, e aínda que esteas lonxe, estrañado, vén a ti en forma de olores que non se poden nomear porque están no aire, son o aire de La Laguna».

Santiago de Compostela segue a ser o punto de encontro de peregrinos de todo o mundo, que contemplan con fascinación a praza do Obradoiro e a súa espectacular catedral nada máis chegar. Unha cidade monumental onde gozar do seu ambiente e a súa gastronomía ao longo de todo o ano.

Velaquí unha cidade milenaria e unha das máis fermosas do mundo. O seu acueduto é a construción de enxeñaría civil máis importante da Hispania romana. O Real Alcázar de Segovia é un dos monumentos máis visitados do país. A gastronomía da cidade é outro grande atractivo para quen a visita.

Son 13 os monumentos que conforman o conxunto romano da antiga cidade de Tarraco. O anfiteatro romano, a carón do mar, é un dos máis impresionantes, xunto coas murallas. Unha cidade que seduce polo seu patrimonio histórico-artístico, pola súa gastronomía e por ser un balcón excepcional cara ao Mediterráneo.

Considerada a vista nocturna máis impresionante do mundo, sorprende tanto de día como de noite pola súa intensa vida cultural. Tamén é a cidade das tres culturas pola convivencia de cristiáns, árabes e xudeus ao longo da historia.

Unha das cidades renacentistas máis impresionantes de España, rodeada polo maior oliveiral do país. Trátase dun destino monumental onde se conservan a artesanía e as tradicións, cunha excelente gastronomía baseada na cultura do aceite de oliva.